Байзақ ауданының Орталық аудандық ауруханасында Жамбыл облыстық қан орталығы қан дайындау бөлімінің меңгерушісі Досжанова Салтанат Мейрхановна 2007 жылы туған, Гийен–Барре синдромы диагнозы қойылған қыз балаға плазмаферез процедурасын жүргізді.
Гийен–Барре синдромы - сирек кездесетін аутоиммунды ауру.
Бұл дерт кезінде иммундық жүйе шеткі жүйкелерді зақымдайды. Ауру аяқ-қолдың әлсіреуімен, ұюымен сипатталып, бірнеше күн немесе апта ішінде үдеуі мүмкін.
Ауыр жағдайларда тыныс алу бұлшықеттерінің зақымдану қаупі бар, сондықтан емдеу стационар жағдайында жүргізіледі.
Емдеу барысында пациентке жалпы 5 рет плазмаферез сеансы жасалды.
Үшінші сеанстан кейін оң динамика байқалып, қыз бала өздігінен жүріп-тұра бастады.
Уақытылы көрсетілген медициналық көмек пен заманауи емдеу әдістерін қолдану аталған диагнозбен науқастардың сауығуында маңызды рөл атқарады.
