1995 жылдың 30 тамызында бүкілхалықтық референдумда қабылданған Конституцияның тәуелсіз еліміздің тарихында алатын орны айрықша. Сол уақыттан бері бас құжат бұлжымас бағдарымызға, тұтастығымыздың тұғырына айналды. Биыл айтулы Ата Заңымызға 30 жыл толып отыр. Мән-маңызы зор мерекеге орай Жамбыл облыстық қан орталығында салтанатты жиын өтті. Мерекелік шара Мемлекеттік Әнұранды шырқаумен басталды.
Байыпты басқосуды орталық директорының медициналық жөніндегі орынбасары Әсел Құлымбетова ашып, құттықтау сөз сөйледі. Бүгін – еліміз үшін ерекше күн. Біз қасиетті мереке – Қазақстан Республикасы Конституциясы күнінің 30 жылдығына арналған салтанатты жиынға жиналып отырмыз.
Конституция – еліміздің негізгі заңы. Ол біздің мемлекетіміздің іргетасы, тәуелсіздігіміз бен тұрақтылығымыздың кепілі, әрбір азаматтың құқығы мен бостандығын қорғайтын құжат. Осыдан 30 жыл бұрын, яғни 1995 жылы 30 тамызда жалпыхалықтық референдум нәтижесінде қабылданған Конституциямыз – біздің жарқын болашаққа бастайтын бағдарымыз.
Осы айтулы мерекемен баршаларыңызды шын жүректен құттықтаймыз! Еліміз аман, Тәуелсіздігіміз тұғырлы болсын!- деді өз сөзінде Әсел Мырзалықызы.
Мерейлі мезетте денсаулық сақтау саласындағы адал еңбегі мен кәсіподақ қозғалысының нығаюына қосқан үлесі үшін, Қазақстан Республикасы Конституциясы күніне орай Серғазы Жамангараевқа «SENIM» Денсаулық сақтау жүйесі жұмыскерлерінің салалық кәсіптік одағының Құрмет грамотасы салтанатты түрде тапсырылды.
