Көктем мезгілі жақындаған сайын көңіл көкжиегі де кеңейіп, ертеңгі күнге деген үміт мен сенімділікті нығайта түсетіндігі сөзсіз. Әр күні жылға азық саналатын маусымның қарсаңында Алғыс айту күніне орайластырып ізгілікке толы шараларды көптеп ұйымдастыру үйренерлік үрдіске айналғандай. Осы орайда «Қазфосфат» жауапкершілігі шектеулі серіктестігінің өндірістік құрылымдары біріне бірі қайырымдылық эстафетасын жолдап жатқандай әсер қалдырады. Кеше «Минералды тыңайтқыштар» зауытының қызметкерлері қан тапсырса, бүгін Жаңа Жамбыл фосфор зауытының ұжымы донорлар қатарын толықтырды.
Донор болу-ерікті түрде атқарылатын амал. Десек те осы бір қадам арқылы қаншама адамның өмірін арашалап қалуға үлес қосасыз, қиындықтан құтқарасыз, қалыпты тіршілікке оралуға жәрдем бересіз. Бұл әрі патриоттық, әрі азаматтық! Жанашырлық пен бауырмалдықтың белгісі. Бір-бірімізге көмек қолын созу арқылы сансыз сауапқа кенелетіндігіміз сөзсіз. Бұл тұрғыда Жаңа Жамбыл фосфор зауытының ұжымы бүгін тағы бір мәрте ізгіліктің үлгісін көрсетті. Ендеше, біз де сала мамандарын Алғыс айту күнімен құттықтап, донорлық қозғалысқа қосқан сүбелі үлестері үшін риясыз ризашылығымызды білдіреміз.
https://tarazdonor.kz/kz/zha-aly-tar/1408-mineraldy-ty-ajt-yshtar.html#sigFreeIdd318ded352
